Ubwite bwa kutesha
“Umfweni bonse ukondi, mutesekeshe! Twakaba icakunse, icingakowesho muntu nga caingila munda yakwe; icifuma munda ya muntu, e cikowesho muntu” (Mk. 7:14-15)
Icibote ca Mfumu Yesu Kristu cibe nenu bonse!
1. Ilyo twatendeka inshita ya Kwaleshima, kuti nakabila twatontonkanya pamo pa “Bwite bwa Kutesha”, emukutila ukukutika kwishiwi lya munama nkati kamitima yesu; kumilandu yabumi bwesu; nefintu tushingwana nafyo cila umo. Cila mwaka, Lesa alatupela iyi Nshita “ngecishibilo” “ca bwile” bwakupilibuka kwesu. Muli ino Nshita Lesa alatwita kukumfwa no kutesekesha kwishiwi lyakwe pakuti twalulule ubumi bwesu nokutoola Inshila iyiipya iyakwikalililamo.
2. Ukumfwa kulakabila umubeele wakutesha. Emukutila, ukukwata akashita kakwikala tondolo pakumfwa kwishiwi lya munama nkati kamitima yesu; nakabili, calola muku kwata akashita kakumfwa kumilandu yabumi bwesu cila bushiku iyo batutashishapo no ku tusushishapo. Kabili calola mukukwata akashita kakumfwa kumilandu tushingwano nayo iyisuma neyi ibi. Cibe nimukati kamafya tushingwano nayo cila bushiku tulekabila ukukwata akashita kakumfwa no kwishiba iyi milandu, ifintu tu pitamo, namashiwi ayalekana lekana ayo tumfwa mukati ka Mitima yesu.
3. Yesu, ashibatishiwa fye mu Yordani, Mweo amutungulula mu matololo, emo aikala inshiku amakumi yane akasuba no bushiku, alesalika no kufunga icakulya (cf. Lk. 4:1-13; Mt. 4: 1-11 elyo na Mk. 1:9-13). Kulibaifwe, Amatololo, yaba nincende yabuchushi nokuikanya. Kabili yaba nincende ya kupelelwa amaka nokubwesha icefu. Amatololo cifulo umotufundwa ukulekako kufintu ifi tuteemuna, ukuicindika no ukuikanya. Kabili nincende itwafwa ukutola imibele ine ine pakwasuka kubwite bwakwa Lesa (cf. Banda, 2011).
4. Cila umo pali baifwe alisondapo amatololo mubumi bwakwe – inshita yabuchushi nokuikanya, inshita ya kupelelwa amaka nokubwesha icefu, elyo ninshita iya ibela yakwishiba cipya cipya icisumino cesu. Iyi nshita, nishita emo twishibila nokusonda umupwilapo buchibusa bwesu no Mwana wakwa Lesa, nakendi buchibusa bwesu na Lesa. Nakansha, inshita Yakwaleshima yaba ngo bupe umo twaba no kutesekesha, ukuilengula, ukuishiba, no kwishiba Chibinda wabumi bwesu uwutwita kuli bucibusa bwakwe.
5. Muli iyi inshita Yakwaleshima Imfumu ilatwita ukuya mumatolo yamitima yesu, tepamulandu wakufunga Nayo epela, lelo ilatwita pakuti twingatesha kwishiwi lya
munamanankati kamitima yesu. Ili ishiwi lilatupamfya pakuti twingawamya no ku kantula ububi bonse, nga: “Imitontonkanishishe iyabipa, ubulalelale, ubupupu, imisoka, ulubembu, ulongolo lwafyuma, ubunkalwe, ubucenjeshi bubi, ubukakashi, umufimbila, insele, icilumba no bupuba bonse”, (cf. Mk. 7:21-22). Ukwikala tondola nokukutumana citupela ishuko lyakumfya kwishiwi lyamunamankati kamitima yesu ilitukomkomesha ukuwamya no ku kanabifya. Umulandu wa kweshiwa kwakwa Yesu Kristu (Mt. 4:1-11), utulanga ifyo Ciwa atongola mukucita ifibi mukubomfwa ifyo bumuntunse bwesu bukabila nge: icakulya, ukuisansamusha pamo pene fye na maka. Lelo, Yesu akantula Ciwa asalapo: ukubulilwa icakulya, ukuicefya noku bela. Namukulekelesha acimfya Ciwa. Eico kanshi naifwe nga twasalapo ukukutikisha kwishiwi lya Mfumu tukacimfya Ciwa ne sambi.
6. Nshita Yakwaleshima itwita kukumfwa no kutesha cilabushiku kumilandu yabumi bwesu iyo batutashishapo no kutusushishapo. Ii nshita ifwile ukutwafwa ukumona ukutila ati ukucenjela mufintu ifyalekana lekana takutucita icafwilisho chikabilwa nabanensu nakalya. Lelo icitucita icafwilisho, mukubomfya ifyabupe twakwata mukupakamisha ubumi bwabanensu. Kuti twaba abapalwa necabupe camano, lelo nga cakuti ici icabupe bwesu tacileyafwilisha mukusanga amasuko kamafya yabwina bantu, ninshi twayakashafye. Kuti twakwata amapange ayasuma, lelo nga teyalekuula ubumi bwa bekala calo, ninshi kuti yaba cakuipununako. Kuti twakwata akasampu nangula amaka, lelo ifi fyonse fyafye fye ngakuti twafibomfya mukonaula no kufupula abanensu.
7. Mukuibebeta fwebene, ciletulanga apabuta tutu ukuti ubuyo bwabumuntu bwesu tabwafye mufyuma twakwata, lelo bwaba mucafwilisho tupeela mukupakamisha ubwina bantu. Nangula twingaba abapakama, bakatebebe, bashimukokota nsono, ifi fya-fye fye nga cakuti ubumi bwesu bulelola mukonaula abanensu. Kanshi ino nshita iya kumfwa nokutesha inga twafwilisha ukubomfya bwino ifya bupe twakata no ku taluka ku mibele iibi, ukutaluka kubonaushi, pakuti tusambilile ukuikankanya pakupamisha ubuyantanshi bwa calo cesu.
8. Lekeni inshita yakumfwa kwishiwi lyamukati kamitima yesu, imilandu yacila bushiku, nefintu tushingwana nafyo cibe cafwilisho cakumona Lesa mu fintu fyonse no kutusanikila ukukwatisha icilaka cakutimika Lesa na bantu banensu.
Twalomba ne cafwilisho cakwa nyinefwe Maria, muli buno bushiku bwa 14th February, Citatu wa Mito, mumwaka wa Mfumu, 2018.
+ Dr. Alick Banda
Apostolic Administrator of Ndola